കുഴൂർ: വഴിയിൽ വീണു കിട്ടിയ സ്വർണ്ണ താലിമാല ഉടമസ്ഥയെ കണ്ടെത്തി തിരികെ നൽകി മാതൃകാപരമായ പ്രവർത്തനം. കുഴൂർ സ്വദേശിയായ ആന്റു ആണ് സത്യസന്ധതയുടെ പ്രതീകമായി പ്രദേശവാസികളുടെയും പുതുതലമുറയുടെയും കൈയടി നേടുന്നത്.
കഴിഞ്ഞ ദിവസം കുഴൂരിലെ ഒരു മരണവീട്ടിൽ എത്തിയ യുവതിയുടെ താലിമാലയാണ് അബദ്ധത്തിൽ നഷ്ടപ്പെട്ടത്. വീണുപോയ മാല വഴിയിൽ കിടന്നു കിട്ടിയ ആന്റു, ഒട്ടും മടിക്കാതെ വിവരം ജനപ്രതിനിധികളെ അറിയിക്കുകയായിരുന്നു.
തുടർന്ന് കുഴൂർ ഗ്രാമപഞ്ചായത്ത് പ്രസിഡന്റ് സിൽവി സേവ്യാർ, വാർഡ് മെമ്പർ ആൻസി വർഗ്ഗീസ് എന്നിവരുടെ സാന്നിധ്യത്തിൽ മാലയുടെ യഥാർത്ഥ ഉടമസ്ഥയെ വിളിച്ചുവരുത്തി സുരക്ഷിതമായി കൈമാറി. നഷ്ടപ്പെട്ടു എന്ന് കരുതിയ താലിമാല തിരികെ ലഭിച്ച സന്തോഷത്തിലാണ് യുവതിയും കുടുംബവും.
ഇന്നത്തെ കാലത്ത് അപൂർവ്വമായി മാത്രം കാണുന്ന ഇത്തരം സത്യസന്ധതയും നന്മയും പുതുതലമുറയ്ക്ക് വലിയൊരു മാതൃകയാണെന്ന് ഗ്രാമപഞ്ചായത്ത് പ്രസിഡന്റും മറ്റ് നാട്ടുകാരും അഭിപ്രായപ്പെട്ടു. ആന്റുവിന്റെ ഈ മാതൃകാപരമായ പ്രവൃത്തിയെ അഭിനന്ദിച്ച് നിരവധി പേരാണ് രംഗത്തെത്തിയത്.
