തിരുവനന്തപുരം: വലിയ ഗ്ലാസ് ജനലുകളിലൂടെ പുറംകാഴ്ചകളും ആകാശദൃശ്യങ്ങളും കണ്ടുകൊണ്ട് മനോഹരമായൊരു യാത്രയ്ക്കായി കാത്തിരിക്കുന്നവർക്ക് സന്തോഷവാർത്ത. കേരളത്തിലെ ആദ്യ വിസ്റ്റാഡോം കോച്ചിന്റെ ഉദ്ഘാടന സർവീസ് ഈ മാസം 22 മുതൽ മധുര-ഗുരുവായൂർ എക്‌സ്പ്രസിൽ ആരംഭിക്കും.
പ്രകൃതിഭംഗി തുളുമ്പിനിൽക്കുന്ന കൊല്ലം – പുനലൂർ – ചെങ്കോട്ട റെയിൽവേ പാതയിലൂടെയാണ് ഈ പ്രത്യേക സർവീസ് കടന്നുപോകുന്നത്. യാത്രക്കാർക്ക് ഈ പാതയിലെ പച്ചപ്പുനിറഞ്ഞ കുന്നിൻചെരിവുകളും പുഴകളും മറ്റും ഏറ്റവും തെളിമയോടെ കണ്ട് ആസ്വദിക്കാൻ പുതിയ വിസ്റ്റാഡോം കോച്ചുകൾ സഹായിക്കും.
ദക്ഷിണ റെയിൽവേ പരീക്ഷണാടിസ്ഥാനത്തിലാണ് പുതിയ കോച്ച് അനുവദിച്ചിട്ടുള്ളത്.
ആഴ്ചയിൽ നാലുദിവസം വീതം ഇരുദിശകളിലേക്കും വിസ്റ്റാഡോം കോച്ച് സർവീസ് നടത്തും.
ഗുരുവായൂരിലേക്കുള്ള യാത്ര: പുലർച്ചെ 2.30-ന് ട്രെയിൻ ഗുരുവായൂരിലെത്തും.
മധുരയിലേക്കുള്ള മടക്കയാത്ര: രാവിലെ 5.50-ന് ഗുരുവായൂരിൽനിന്ന് പുറപ്പെട്ട് രാത്രി 7.10-ന് മധുരയിലെത്തിച്ചേരും.
റെയിൽവേയുടെ ഈ പുതിയ ചുവടുവെയ്പ്പ് മലയോര പാതയിലെ വിനോദസഞ്ചാര സാധ്യതകൾക്കും യാത്രക്കാരുടെ അനുഭവങ്ങൾക്കും വൻ മുന്നേറ്റമുണ്ടാക്കുമെന്നാണ് പ്രതീക്ഷിക്കുന്നത്.
