തിരുവനന്തപുരം: സംസ്ഥാനത്തെ മന്ത്രിമാരുടെയും എം.എൽ.എമാരുടെയും ശമ്പളവും അലവൻസുകളും വർധിപ്പിക്കുന്നതിനുള്ള ബിൽ നിയമസഭ ഏകകണ്ഠമായി പാസാക്കി. നിലവിൽ എം.എൽ.എമാർക്ക് ലഭിച്ചിരുന്ന പ്രതിമാസ ശമ്പളം 70,000 രൂപയിൽ നിന്ന് 98,000 രൂപയായി ഉയർത്തി.
മന്ത്രിമാർ, സ്പീക്കർ, ഡെപ്യൂട്ടി സ്പീക്കർ, പ്രതിപക്ഷ നേതാവ്, ചീഫ് വിപ്പ് എന്നിവരുടെ പ്രതിമാസ വരുമാനം 1,08,000 രൂപയിൽ നിന്ന് 1,22,000 രൂപയായാണ് വർധിപ്പിച്ചത്.
ശമ്പള വർധനവിന് പുറമേ ജനപ്രതിനിധികളുടെ യാത്രാബത്ത ഉൾപ്പെടെയുള്ള വിവിധ അലവൻസുകളിലും തുക വർധിപ്പിച്ചിട്ടുണ്ട്. ജീവിതച്ചെലവിലുണ്ടായ വർധനവും യാത്രാച്ചെലവുകളും കണക്കിലെടുത്താണ് ശമ്പള പരിഷ്‌കരണത്തിന് ശുപാർശ ചെയ്ത കമ്മീഷൻ റിപ്പോർട്ടിന്റെ അടിസ്ഥാനത്തിൽ സഭ ബിൽ പാസാക്കിയത്.
